UP Maroons iniligtas ni Cruz

Ikinamada ni Marvin Cruz ang game-winning short jumper sa huling 0.3 segundo ng labanan tungo sa 94-92 panalo ng University of the Philippines laban sa University of Santo Tomas sa pagpapatuloy ng UAAP seniors basketball tournament sa Ninoy Aquino Stadium kahapon.

Tumapos si Cruz ng 25-puntos para sa UP Maroons na humilera sa mga opening day winners na host University of the East at Ateneo De Manila University.

Binigyan naman ng Adamson Baby Falcons ng panalo ang kanilang coach na si Dayong Mendoza sa kanyang debut game matapos igupo ang UST Tiger Cubs, 59-55.

Sa iba pang juniors games, pinangunahan ni Raymond Austria ang Ateneo Blue Eaglets sa pagkamada ng 17 puntos at 9 rebounds tungo sa 83-56 pananalasa sa National University Bull-pups, habang bumandera naman si Dexter Rosales sa pagtatala ng 18-puntos para sa 99-61 pagdurog ng FEU Baby Tams sa UE Pages.