MLSDF-Mantawi milubong sa Sogod

Gisugdan sa M. Lhuillier Sports Development Commission (MLSDF)-Mantawi Dream Team ilang kampanya sa kampiyonato pinaagi sa paglubong sa Sogod Selection, 80-60 sa 2006 Compostela Mayor's Cup Invitational 21-Under Basketball Tournament didto sa Compostela municipal gym.

Si Anjun Cabahug mikulit og otso sa iyang 14 puntos sa ikaduhang kuwarter nga maoy nakapainit sa MLSDF-Mantawi Dream Team dayon na ngadto sa ilang pagdominar sa duwa.

Ubos sa liderato ni Cabahug, ang Mantawi ni coach Ancing Anciado milabaw og 12 puntos human sa first half, 35-23.

Sila si Patrick Jacobe ug Joven Cortes miarangkada sab aron pag-inat sa labaw ngadto na sa 21 puntos, 58-37 sa katapusang kuwarter.

Ang Mantawi Dream Team giatiman ni MLSDF executive director ug team consultant Eddie Ybañez, samtang si Montoy Singon maoy assistant coach ni Anciado.

Ang Mantawi gipaluyohan sa nagkahiusang puwersa sa MLSDF ug sa Mandaue City Sports Development Commission ubos sa liderato ni Cheryl Ouano.