Letran lusot sa JRU

Bihira sa isang head coach na umaamin sa kanyang kasalanan. 

At ito ang siyang ginawa ni Louie Alas matapos ang 74-70 pagtakas ng nagdedepensang Letran College sa Jose Rizal University sa 82nd NCAA men’s basketball tournament kahapon sa NInoy Aquino Stadium. 

"Partly kasalanan ko talaga kung bakit nakadikit ‘yung JRU kahit na lumamang kami ng 13 points in the last three minutes of the game," ani Alas.

Ikinasa ng Letran ang kanilang 13-point lead, 72-59, mula sa isang 3-pointer ni RJ Jazul sa 2:42 ng fourth quarter kasunod ang pag-upo ni veteran guard Boyet Bautista na sinamantala ng JRU, may 0-2 baraha, para idikit ang laro sa 65-72 buhat sa anim na sunod na freethrows ni John Wilson, 1:12 rito. 

Ang dalawang mintis na opensa ng Knights ang nagresulta sa tres ni Mac Cagoco at charities ni Carlos Fenequito para sa kanilang 70-72 agwat, 4.3 segundo na lamang. 

Sa unang juniors game, nanaig ang JRU Light Bombers sa 110-98 panalo kontra Letran Squires. (RCadayona)