Banal mi-TKO ni Pader sa 'Rambol sa Island City Mall'

Laing bituon gikan sa ALA boxing gym ang misilak didto sa dakbayan sa Tagbilaran.

Si superflyweight prospect AJ Banal mipakita sa iyang kabangis pinaagi sa pagmakmak ni RP No. 10 jr. bantamweight contender Jun Pader aron pagdaog pinaagi sa TKO sa ikaupat nga hugna sa miaging gabii sa "Rambol sa Island City Mall" card didto sa ICM carpark.

Si Banal, kinsa lumad nga taga-Corella, Bohol mihasmag dayon pagsugod sa kumbati hinungdan nga nagkapoliki og panagang si Pader sa naghaguros nga mga kumo ni Banal.

Ang marunong nga si Banal mipatama sa iyang mga kumo ngadto sa ulo ug sa lawas ni Pader ug pagsangko sa ikaupat nga hugna iyang gibanatan og maayo ang taga-Mindanao nga boksidor gamit ang makusog nga kombinasyon nga maoy nakapatumba niini.

Ang nabangog nga si Pader mibarog apan nagsandig na lang kini sa pise nga maoy nakaaghat ni referee Teddy Alivio paghunong sa away sa 2:56 sa ikaupat nga hugna.

Si Banal miinat sa iyang baraha nga 7-0 win-loss diin unom sa iyang mga daog pulos gipahunong.

Si Banal gikatakdang mopakita sa iyang abilidad sa Sandugo boxing festival batok sa wala pa hisayri nga kaatbang karong Hulyo 22 didto gihapon sa Tagbilaran.

Lain pang midaog sa maong promosyon nga gipresentar sa SGG Sports Promotions ni international promoter Sammy Gello-ani uban sa Island City Mall ug sa kagamhanan sa dakbayan sa Tagbilaran ubos sa pagpangulo ni Mayor Dan Neri Lim, si Milan Melindo midaog sab batok ni Michael Rodriguez sa Kidapawan.

Si Nic Banal sa AEV stable midaog pinaagi sa unanimous decision batok ni Max Orcajada. Si Mark Jason Melliguen nagkinahanglan lamang og 53 segundos aron pagpukan ni William Jorge sa Kidapawan.

Sa laing bahin, ang lima ka debutante sa pro ranks nga sila si Wengweng Haya, Gil Melliguen, Marjo Borres, Ricky Sismundo ug Leon Moratas ang milampos sa pagkab-ot og kadaugan batok sa ilang tagsa-tagsa ka kaatbang gikan sa Butuan.

Si Haya mipatugpa og right hook ug gisundan kini sa makamatay nga left uppercut nga maoy nakatumba ni Tata Fernandez sa 2:24 sa third round.

Midaog sab si Melligeun batok ni Jun Morano pinaagi sa unanimous decision, samtang si Borres midaog batok ni Warren Libres.

Si Sismundo midaog pinaagi sa unanimous decision batok ni Markyll Taroja, samtang sa Moratas midaog pinaagi sa TKO sud lamang sa unang hugna batok ni Kenjie dela Cruz sa oras nga 2:11.