Alvarez mopadayon sa iyang katuyoan pag-ugmad sa differently-abled swimmer

Human sa malampusong kampanya sa 1st Philippine Olympic Festival, si swimming coach Rolando Alvarez mopadayon gihapon sa iyang taras pag-ugmad og dugang differently-abled swimmer sama niya.

Si Alvarez, kinsa biktima sa polyo wala manumbaling sa iyang pagka-disabled inay misamot ang iyang kakugi nga mahimong modelo alang sa mga batan-on aron mamahimong kampiyon sa umaabot.

Misubang ang ngan ni Alvarez dihang giapil sa programa sa Philippine Amateur Swimming Association (PASA) ang kategoriya sa differently-abled swimmers.

Sa labing ulahi niyang pagsalmot og kompetisyon, ang four-man Team Cebu nga gipangulohan ni Alvarez, misakmit og siyam ka bulawan ug upat ka silvers.

Tungod sa ilang kalampusan, si Alvarez miawhag sa tanang mga tawo nga adunay kakulian pagsalmot sa team.

Niadtong interesado mahimong motawag sa 419-6459 o dili ba 0916-455391 o pakigkita ni coach Alvarez sa Cebu City Sports Center.

Sa pagka karon, ang Team Cebu City nangandam alang sa 4th PHILSPADA National Games nga gitakda sunod tuig didto sa Bacolod.

Ang PHILSPADA event maoy ayagan sa mga atleta, kinsa maoy morepresentar sa nasud alang sa international events sa 2007.