Gawas nga midaog, ang Osaka Iridology nakaangkon sab og "twice-to-beat" advantage sa ila unyang pakigbatok sa CEC '60s.
Ang Batch '86 milimpiyo og 11-3 win-loss record, baliktad sa nakuha sa CEC '60s nga 3-11.
Si Arturo Pepito Mata, kinsa mipabuto og 45 puntos maoy migiya pagpakanaog og 9-1 run aron pagpa-abante sa Osaka Iridology '86 og otso puntos, 27-19 sa unang kuwarter. Milangkat sab siya og unom ka rebounds uban sa lima ka assists.
Wala sab magpabitin si John Andrew Auza, kinsa mao usab ang migiya sa Libresse '82/'88 sa ikaduhang kuwarter dihang miposa kini og 10 sa kinatibuk-an niyang 24 puntos, samtang si Edmund Odulio, kinsa miamot og 23 puntos maoy responsable pagpahiyos sa labaw ngadto na lang sa dos puntos, 42-40, paghuman sa first half.
Gipalapdan sa Libresse ang ilang labaw ngadto na sa siyete puntos ubos ni Bonito Zanoria, kinsa mitampo og 15 puntos.
Apan ang Osaka Iridology '86 pinaagi nilang Mata, Noli Romarate ug Roque Amores nga maoy nagsugnod sa 8-2 run yano kaayong nakabangon sa himalatyong oras sa third quarter.
Sa katapusang kuwarter wala na mabangbang ang nag-aso-asong opensa ni Mata lakip na niini ang tulo ka long distance jumpers sa katapusang tres minutos sa duwa nga maoy nagtunol sa ika-11 nga daog sa Osaka Iridology.