Guts and talent

Ang kalamposan sa bisan unsang pakigbisog anaa sa determinasyon. Kinahanglan nga imong tinguhaon ang pagkab-ot sa usa ka butang aron imo kining maangkon. Kinahanglan nga mangursonada ka. Kinahanglan nga maningkamot. Kini ang sekreto sa tanang malampusong linalang.

Mao usab kini ang gikinahanglan sa usa ka bilyarista. Gikinahanglan sa usa ka magdudula niining maong disiplina ang hugot nga determinasyon aron siya magmalampuson sa iyang career. Angay isilsil kanunay sa alimpatakan sa magdudula nga ang iyang career wala magsugod ug matapos sa usa lamang ka hugna sa iyang pagdula. Molungtad kini og dugay kun iyang ampingan ug palambuon.

* * *

Matud pa sa mga iladong billiard columnist, sama nila ni Tom Ross, Alice Rim, Roger Long, Kerry Hartsfield Impson, The Monk ug uban pa, ang pagdula og bilyar nagkinahanglan og pailob ug kamapangahason. Gawas niini, kinahanglan nga ang magdudula adunay kapasidad ug kapabilidad. Unsay buot ipasabot niini?

Sumala sa nahisgutang mga eksperto, ang gikinahanglan sa magdudula mao ang "guts and talent." Kini gyud ang importante kaayo. Kun aduna ikaw ning talent pero wala kay guts, dili mosaler ang imong abilidad. Kun duna kay guts pero wala kay talent, dili gihapon magsilbe. Hinuon, may mga kahimtang nga mo-epekto ang guts bisan kulang sa talent tungod kay mahimo mang mapun-an ang nakuwang pinaagi sa makugihon nga pagbansay.

* * *

Apan ang mga eksperto nag-ingon nga mas maayo gayod kun ang usa ka magdudula nagbaton sa "guts and talent." Nila pa, dili puwedeng bulagon kining duha. Kinahanglang magkuyog gayod kini sila aron mas epektibo ang pagdula sa usa ka bilyarista. Makasinati ang magdudula og komplikasyon kun ang usa niining duha mawala kaniya.

Kining "guts and talent" maoy nabatonan sa atong batid nga mga bilyarista karon, ilabi na gayod nila ni Efren 'Bata' Reyes, Francisco 'Django' Bustamante ug Alex 'The Lion' Pagulayan. Kun wala may "guts and talent" si Reyes, magpabilin lang unta siyang estambay sa bilyaran ug walay mahitabo sa iyang kinabuhi. Kun wala pay "guts and talent" si Bustamante, dili siya mahimong kampiyon sa usa ka torneyong iyang giapilan atol nga may daotang nahitabo sa usa sa mga sakop sa iyang banay. Kun wala pay "guts and talent" si Pagulayan, sa iyang kabatan-on dili siya mangahas sa pagpakiglahugay sa mga beteranong bilyarista sa kalibotan.

* * *

Kini maoy pipila lang ka sanglitanan aron pagmatuod kun unsa kamahinungdanon ang "guts and talent" alang sa usa ka magdudula. Karon, Bords, sutaa sa imong kaugalingon kun aduna ka ba niini. Kun aduna, mas maayo. Kun wala, ikaw nay mohukom sa imong kaugmaon.

* * *

(Text sa 0910-8105522)