Pipeline milubong sa Smart

Midaog na usab ang Pipeline Resto Bar pinaagi sa paglubong sa Smart Tires sa iskor nga 108-79, sa 30-above division sa Punta Princesa Sports Association (PPSA)-Guardo Summer Cup basketball tournament diha sa Vicente Sotto Memorial Gym sa Brgy. Punta Princesa.

Si Robert Abasolo mipauwan og 17 puntos, samtang si playmaker Lito Navarro ug Reeve Jumawan miamot og 16 puntos matag-usa nga maoy naghatag og kahayag sa Pipeline nga moduwa og kampiyonato bitbit ang 8-2 win-loss record.

Wala mag-usik og panahon ang Pipeline ug ila gilayong gilubong og 13 puntos ang Smart Tires, 33-20 paghuman sa unang kuwarter.

Tungod sa katag nga depensa sa Smart miburot ang labaw sa Pipeline ngadto na sa 19 puntos, 57-38 paghuman sa first half.

Sila si Emy Daclan ug Ciobern Mante nagkumboya og 25 puntos alang sa kadaugan sa Pipeline nga miposte sa ilang kinadak-ang labaw nga 29 puntos.

Samtang sila si Kadong Paca ug Danny Desoyo mitapak og 17 puntos matag usa alang sa pilderong Tiremen.

Sa laing aksiyon, nagmilagro ang Wilkris pinaagi sa pagpukan sa Cokaliong Shipping Lines, 117-110.