Dayon away ni Amonsot

Mahinayon gyud ang away tali nilang ALA Boxing Gym star Czar Amonsot ug Silverio Ortiz sa undercard sa pagdepensa ni Manny Pacquiao sa iyang WBC International super featherweight title batok ni Oscar Larios karong Hulyo 2 didto sa Araneta Coliseum.

"Kompirmado na. Si Amonsot mo-away ni Silverio Ortiz sa undercard ni Manny Pacquiao," matud pa sa Sugbuanong bigtime promoter nga si Rex 'Wakee' Salud, usa sa mga utok sa maong eksplosibong promosyon.

Si Ortiz orihinal unta nga makigharong batok ni kanhi OPBF super featherweight champion Randy Suico, apan mi-atras ang Sugbuanon sa maong promosyon gumikan kay nakaangkon kini og oportunidad nga moharong sa way pildeng WBA lightweight champion nga si Juan Diaz karong Hulyo 15 didto sa Las Vegas.

Gumikan niini, ang promoters mikuha ni Amonsot aron ihulip sa dapit ni Suico, apan ang kampo sa Meksikano nagkanayon nga si Ortiz dili moaway og "southpaw" nga boksidor sama ni Amonsot.

Hinuon, si Salud nagkanayon nga ilang nakumbinsi ang kampo sa Meksikano human sila mitanyag nga padak-an ang premyo ni Ortiz aron lang makigsinukliay og kumo ni Amonsot.

"Amo gyud gipangitaan og paagi nga mahinayon ang away. Maayo na lang gani midawat ang kampo sa Meksikano sa among offer nga padak-an ang premyo ni Ortiz aron lang mo-away ni Amonsot," dugang pa ni Salud.

Ang pagsal-ot ni Amonsot seguradong makadugang og kahayag sa maong multi-million nga promosyon human ang iyang stablemate nga si Rey 'Boom Boom' Bautista na-ospital tungod sa grabeng hilanat.

Maayo na karon ang kahimtang ni Bautista ug moguwa na kini karon sa Cebu Doctors' Hospital apan dili pa kini mahimong moaway.

Si Bautista gitakda untang moaway sa undercard sa Pacquiao-Larios fight batok ni Alejandro Felix Montiel.

Hinuon, gikompirmar nga si RP bantamweight champion Michael Domingo maoy ihulip ni Bautista.