Tuason bag-ong napiling presidente sa CESAFI

Ang vice president for administration sa Cebu Doctors' University (CDU) nga si Engr. Oscar Tuason maoy napiling bag-o nga presidente sa Cebu Schools Athletic Foundation, Inc. (CESAFI), samtang si Felix O. Tiukinhoy Jr. mibalik sab sa kanhi niyang posisyon isip commissioner.

Si Tuason maoy mohulip sa dapit nga gibakantihan ni University of the Visayas (UV) Executive Vice President Jose 'Dodong' Gullas, kinsa miputol sa iyang termino ngadto na lang sa usa ka tuig sa wala matino nga hinungdan.

Mao kini ang ikaduhang higayon ni Tuason nga nangulo sa CESAFI, ang una atol sa school year 2003-2004.

Lain pang napiling 2006 CESAFI officers mao sila si Gregorio Escario sa Cebu Institute of Technology (vice president), Atty. Teodoro Diez sa Velez College (secretary), Fr. Roderick Salazar, SVD sa University of San Carlos (treasurer), Bro. Mari Aberasturri sa Don Bosco College ug Dr. Alicia Cabatingan sa University of Southern Philippines-Foundation (auditors) ug Lassie Holopaines sa Southwestern University (PRO).

Naglangkob sa CESAFI board mao sila si Atty. Augusto Go sa University of Cebu, Jose R. Gullas sa UV, Kho Siok We sa Cebu Eastern College ug Fr. Constantino Real, OAR sa University of San Jose-Recoletos.

Ang 6th CESAFI season gikatakdang buksan karong Hulyo 15 o dili ba sa Hulyo 22 diha sa Cebu Coliseum.