Ang iyang kadaugan sa DYAB Circulan 10K Run sa miaging semana maoy gihimong inspirasyon ni Singson aron malangkat ang ikaduhang titulo pinaagi sa paglabang sa finish line sa oras nga 25 minutos ug 35 segundos.
Si Mendel Lopez sa University of Southern Philippines-Foundation mipahiluna sa ikaduha sa oras nga 25:41, samtang si Reiz Enriquez maoy nakakuha sa ikatulong dapit sa oras nga 25:49.
Sa pikas bahin, si Merlita Arias, kinsa misalmot sa maong event agi'g pagpangandam sa 3rd Cebu Mountain Run karong Domingo maoy mitungtong sa kinatas-ang dapit. Hinuon sa maong lumba wala ang kinakusgan nga sila si Christy Sevillano ug Leizl Getaruelas.
Gitapos ni Arias ang lumba sa oras nga 31:51, samtang si Joeyry Ann Lee maoy mitapos sa ikaduha sa oras nga 32:18.
Si Madelyn Carter, kinsa mitapos sa oras nga 33:18 maoy nakaangkon sa ikatulo nga dapit ning maong lumba nga gipaluyohan sa Bank of Cebu, CNR, D&N Bakeshop ug ERUF.
Sila si event organizer Joel Juarez, Cebu Executives Runners Club founding president Raffy Uytiepo ug race director Elberto Banzon maoy mitunol sa cash prizes, trophies ug medals ngadto sa mga mananaog.