Abapo pakyas gihapon pagsakmit og regional title

Sa ikatulong higayon, napakyas na sab ang Sugbuanong si Bart Abapo sa ALA Stable pagsakmit og regional title human kini mapilde pinaagi sa unanimous decision batok ni Daudy "The Bali Boy" Bahari sa Indonesia sa ilang 12 ka hugna nga kumbati alang sa Pan-Asia Boxing Association (PABA) jr welterweight title sa miaging gabii didto sa Swissotel The Stamford sa Singapore.

Sa nag-unang tulo ka hugna, ang duha ka boksidor nagsinukliay sa mahait nilang mga kumo, apan si Bahari nagsugod og dominar sa ilang kumbati sa ikaupat nga hugna diin agresibo niyang gi-atake si Abapo.

Ang labing nindot nga gipakita ni Bahari nahitabo sa ikasiyam nga hugna nga way puas nga mihamag ug mipatugpa sa nagpungasi nga kumo ngadto ni Abapo.

Apan si Abapo mipakita sa iyang kahanas aron dili ma-knockout.

Sa katapusang hugna, si Bahari naningkamot og maayo nga iyang palukapahon si Abapo, apan ang Sugbuanon yano kaayong milihay sa mga ataki ni Bahari hinungdan nga nagpabilin kining nagbarog hangtud nga natapos ang ilang binakbakay.

Si Bahari nagtangag na karon og baraha nga 29-1-1 (11KOs), samtang si Abapo nadakin-as ngadto sa 17-6-3 (12KOs).

Sa una niyang pagsuway nga molangkat og rehiyonal nga kampiyonato, si Abapo gipakamang sa ikaunom nga hugna sa Australyanong "Black Superman" nga si Gairy St. Clair sa ilang WBF International super featherweight title bout niadtong Hulyo 17, 2004 didto sa State Sports Center sa Homebush Bay, New South Wales, Australia.

Sa ikaduhang higayon, nahisukamod na sab si Abapo nga kab-oton ang iyang damgo human siya gibuntog pinaagi sa 12-round unanimous decision ni Thai Sataporn Singwangcha sa ilang ABC super lightweight championship match niadtong Marso 10 ning tuiga didto sa Rachabhak University sa Petchaburi, Thailand.