"Wala na kaming nasa isip ngayon kundi makuha na ‘yung championship. But we still have to intensify our effort to beat Harbour Centre," sabi ni mentor Louie Alas.
Ibinabandera ang 2-1 abante, sisikapin ng Sparks na wakasan na ang kanilang best-of-five championship showdown ng Harbour Centre Portmasters ngayong alas-3 ng hapon sa Game 4 ng 2006 PBL Unity Cup Finals sa Olivarez College Sports Center sa Parañaque.
Inangkin ng Toyota Otis ang Game 1 buhat sa 68-51 tagumpay bago naitabla ng Harbour Centre ang kanilang serye sa 1-1 mula sa kanilang 78-63 pagwawagi sa Game 2.
Mula sa kinayod na 21 puntos ni JV Casio, tampok rito ang 5-for-6 shooting sa 3-point line, at 13 ni Cebuano cager Ardy Larong, inangkin ng Sparks ang Game 3 via 83-80 victory para itala ang kanilang 2-1 bentahe kontra Portmasters.
Hangad ng Toyota Otis na maibulsa ang kanilang kauna-unahang titulo matapos lumahok sa amateur league noong 2004.
"We’ll definitely go for it. Mag-iiba ang complexion ng series kapag nakatabla pa sila," ani Alas, humugot ng korona sa MBA para sa Manila Metrostars at sa NCAA para sa Letran Knights.
Sina Casio, Larong, Aaron Aban, Boyet Bautista, Mark Andaya at Most Valuable Player (MVP) awardee Joe Devance ang muling babandera sa Sparks katapat sina Joseph Yeo, LA Tenorio, Robbie Reyes, Rico Maierhofer at Chico Lanete ng Portmasters. (Russell Cadayona)