Pacman mobabag sa tinguha sa LHUILLIER

Ang Mindanao Division champion PacMan-GenSan ni boxing superstar Manny Pacquiao mosuway og santa sa bangis nga Visayas Division champion M. Lhuillier Kwarta Padala-Cebu Jewelers sa Game-3 sa best-of-five finals series sa ML Kwarta Padala Mindanao Visayas Basketball Association (MVBA) First Conference karong adlawa didto sa General Santos City Gym.

Ang Jewelers kasamtangan karong nag-una sa serye 2-0 human nila giharos og daog ang duha ka duwa dinhi sa Cebu Coliseum.

Ang duwa sugdan sa alas 6:00 karong gabii.

Paningkamotan sa Pacman-GenSan nga ila makuha ang nahabiling tulo ka duwa aron ilang masanta ang laraw sa Jewelers nga sakmiton ang korona ning torneyo nga gipaluyohan sa ML Kwarta Padala, Cokaliong Shipping Lines, Nature's Spring Drinking Water, Gameface.ph, Panasonic, Molten ug Sulpicio Lines.

Kahinumduman nga ang Jewelers midaog sa Game-1 sa iskor nga 101-91 ug sa Game-2, 92-81 aron pag-ong-ong sa ganghaan sa kampiyonato.

Kun molampos ang Jewelers karong adlawa sila na unya ang maangkon sa makasaysayanong titulo.

Apan dili masayon ang tahas karon sa Jewelers tungod kay ang defensive-minded nga PacMan squad siguradong moabiba gyud og maayo aron ilang kapugngan ang bisitang Jewelers.

Si PacMan coach Ramon Pido malaumon nga makabangon pinaagi sa iyang mga sinaligang mga players nga gipangulohan ni Mindanao Division MVP Louie Medalla (12.0 PPG), swingmen Apol Coronado (13.5 PPG) ug Jethro Recustodio (12.5) uban sa ilang bigmen nga sila si Weng Farochillen (12.0 PPG) ug Jaypee Locsin (13.0).

Apan ang dakung pangutana kun makahimo ba ang PacMan pagduot sa serye ngadto sa Game-4 nga adto gihapon himuon sa General Santos City Gym.

Kun masuwertihan, mabalik dinhi sa Sugbu ang duwa alang sa tinaktakay nga Game-5.