USC mikabkab upat ka bulawan

Ang University of San Carlos ubos sa pagtimon sa managsuong Clark ug Clarence Tiu, maoy nakakuha isip winningest squad uban ang upat ka gold, usa ka silver ug usa ka bronze mdals sa Philippine Bowling Congress (PBC) Youth Inter-School 2nd Quarter Bowling Tournament dili pa dugay diha sa Gaisano Bowlingplex diha sa barangay Banilad, ning siyudad.

Si Clark miani og gold medal alang sa USC pinaagi sa pagpanghawod sa collegiate boys category sa kinatibuk-ang 1,232 pinfalls human sa unom ka adlaw nga serye.

Ang iyang kauban nga sila si Rafael Veloso ug Earl Benedict Uy maoy mipahiluna sa ikaduha ug ikatulong dapit. Si Veloso mihipos og 1,117 pinfalls samtang si si Uy adunay 1,045 pinfalls.

Nakakuha sab og dakung impact ang igsuon ni Clark nga si Clarence dihang iyang gidominar ang majors division-boys uban sa iyang 1,083 pinfalls.

Si John Galendez sa Davao Doctors College maoy mitapos sa ikaduhang dapit uban ang 908 pinfalls, samtang si James Zuluaga sa PAREF-Springdale maoy mipahiluna sa ikatulo sa iyang 898 pinfalls.

Mitunol sa katapusang duha ka bulawan alang sa USC mao sila si Elaine Uy ug Zyrra Cabusas.

Si Uy nanghawod sa collegiate-girls division uban sa iyang 1,067 pinfalls. Ang Lim siblings nga sila si Jacklyn ug Michelle, nga pulos gikan sa Cebu Velez College mipahiluna sa ikaduha ug ikatulong dapit uban sa ilang 1,022 ug 896 pinfalls.

Si Cabusas sa USC-South Grace School mao usab ang nanghawod sa bantam division-girls uban sa iyang 596 pinfalls. Si Karla Sulla sa Stella Maris-Davao maoy ikaduha uban ang 584 pinfalls ug si Guinevere Silva sa Ibale Center for Academy maoy ikadtulo uban ang 470 pinfalls.

Sa majors division-girls, si Kimberly Lao sa Sacred Heart School-Jesuit maoy milangkat sa kampiyonato uban ang 868 pinfalls. Gisundan kini ni Nikki Tan sa Cebu Doctors' University sa iyang 853 pinfalls.

Sa juniors division-boys, sila si Jonathan Aoyama ug Christopher Foyle, sa Marie Ernestine School maoy nakaangkon sa nag-unang duha ka luna human kini makakuha og 916 ug 830 pinfalls. Mipatong sa ikatulong dapit mao si Adrian Zuluaga sa PAREF-Springdale s uban ang 807 pinfalls.

Sa iyang bahin, si John Vincent Galindo sa St. Louis School maoy nanghawod sa bantam division-boys uban sa iyang 514 pinfalls. Si Manuel Nierra II sa Adamson-Davao maoy mipasilong sa ikaduhang dapit sa iyang 506 pinfalls, samtang si Aoyama Yakukazo mitapos sa ikatulo sa iyang 444 pinfalls.