Game 2 sa MVBA Finals

Magkarambola na usab ang M. Lhuillier Kwarta Padala-Cebu Jewelers ug ang PacMan-GenSan sa Game-2 sa ilang best-of-five series sa ML Kwarta Padala Mindanao Visayas Basketball Association (MVBA) First Conference karong alas 6:00 sa gabii diha sa Cebu Coliseum.

Ang Game-1 kasamtangan pang giduwa sa pagsulat niini kagabii.

Seguradong mainit nga panagkaribal ang masaksihan tali sa duha ka koponan.

Nakabentaha ang Jewelers ni team owner Michel Lhuillier ug head coach Raul 'Yayoy' Alcoseba kay mas lapad kini og kasinatian batok sa Pacman. Gani gibahaan na kini sa mga tropeyo nga ilang nasakmit sa mga torneyo dinhi ug gawas sa nasud.

Apan dili sab mabitin ang Pacman-GenSan gumikan kay bisan og kini natukod duha pa ka tuig ang milabay, mipakita man sab kini og kalibre pinaagi sa paghakot og ubay-ubay na sab nga korona sa mga torneyo nga ilang giapilan sa nagkadaiyang dapit sa Kabisay-an ug Mindanao ubos sa paggiya ni coach Ramon Pido.

Sukad matukod ang MVBA sa miaging tuig, gimonopoliya sa M. Lhuillier ug PacMan kini nga liga nga gipaluyohan sa ML Kwarta Padala, Cokaliong Shipping Lines, Nature's Spring Drinking Water, Gameface.ph, Panasonic, Molten ug Sulpicio Lines.

Ang PacMan maoy naghari sa 1st MVBA Governor Gwen Garcia Cup niadtong Disyembre 19 sa miaging tuig diha sa Cebu Coliseum pinaagi sa pagpukan sa M. Lhuillier sa overtime, 91-88 sa kulbahinam nilang kampiyonato.

Apan ang Jewelers nakabawos sa Pacman, 79-69 aron paglangkat sa titulo sa 1st MVBA Mayor Lawrence Cruz Cup didto sa dakbayan sa Iligan niadtong Pebrero 3.

Sa regular season sa MVBA, ang M. Lhuillier mipakaging sa Cebu Landmaster-Toledo, 2-0 sa ilang best-of-three final series, aron pag-angkon sa kampiyonato sa Visayas Division, samtang ang PacMan-Gensan maoy nanghawod sa Mindanao Division pinaagi sa pagpukan sa Iligan Archangels sa kaugalingon nilang serye.

Ang molampus tali sa M. Lhuillier ug PacMan-GenSan maoy makaangkon sa makasaysayanon nga dungog isip labing unang kampiyon sa MVBA.