Heat miangkon sa Game-1

Dakung kauwawan ang naangkon sa Detroit Pistons dihang napakyas kini pagpanalipod sa ilang kaugalingong balwarte atol sa pagpanulong sa Miami Heat.

Ang Heat mipakaging sa Pistons sa iskor nga 91-86 sa Game-1 sa Eastern Conference Finals sa 2006 NBA playoffs kagahapon didto sa Palace of Auburn Hills sa Michigan.

Ang duha ka bituon sa Heat nga sila si Shaquille O'Neal ug Dwyane Wade maoy misidlak og maayo aron pag-iwag sa dalan ngadto sa kalampusan.

Samtang ang trayanggulo nilang Antoine Walker, Gary Payton ug Jason Williams mitunol sab sa ilang suporta ngadto nilang Wade ug O'Neal aron pag-abante sa serye, 1-0.

Si Walker mitali og 17 puntos, si Payton midugang og 14 samtang si Williams adunay 10.

Ang Pistons gibiyaan og 12 puntos sa unang kuwarter ug siyam puntos sa ikaduhang kuwarter, apan hinay-hinay nilang gikaon ang maong labaw hangtud nga ilang nasakmit ang momentum ngadto pag-ilog sa labaw sa labing unang higayon human mapasulod ni Chauncey Billups ang iyang lay-up sa nahabiling 6:55 sa ikatulong kuwarter.

Apan ang two-time defending conference champions nga Pistons wala makaprotektar sa ilang labaw ug nakuha pagbalik sa Heat ang bentaha.

Human mipabuto og 20-5 run ang Heat sa tunga-tungang bahin, kontrolado na nila ang maong duwa hangtod na sa katapusang utong sa maong duwa.

Si Richard Hamilton mihipos og 22 aron pagpangulo sa pilderong Pistons.