Air21 nakahakot og daog

Wala pakyasa sa Sugbuanong si Stephen Padilla ang pagpakita sa abilidad atubangan sa iyang dumadapig dihang gipadaog niya ang iyang koponang Air21 Express batok sa Ginebra Kings sa iskor nga 107-100 sa katapusang out-of-town game sa Gran Matador Brandy PBA Philippine Cup kagahapon didto sa nagsugwak nga Mandaue City Sports and Cultural Complex.

Si Padilla mipupo og 15 puntos ug nirehisto kini sa iyang career high pito ka assists alang sa maong kadaugan.

Si Padilla kinsa milangkat og upat ka rebounds ug usa ka steal, milansang og upat ka triples nga maoy nakapainat sa labaw ngadto sa 15 puntos, 82-67 sa nahabiling 41 segundos sa third quarter.

"Talagang he (Padilla) stepped up for his kababayans. That's why I see to it that he will be given enough playing time," matud pa ni Air 21 coach Bo Perasol.

Ang Air21 niposte sa ilang kinadak-ang labaw, 89-72 human sa putback ni Homer Se sa himalatyong oras sa maong duwa.

Sila si Wyne Arboleda, Leo Avenido ug Ranidel de Ocampo nga nakatabang pagpaburot sa ilang labaw, 107-96 maoy nagselyado sa maong kadaugan.

Ang managsuong Ocampo nga sila si Yancy ug Ranidel maoy nangulo sa kadaugan sa Air21 nga mipupo og 17 puntos matag usa. Sila si Arboleda ug Mark Telan miambit sab og 11 puntos matag usa, samtang si KG Canaleta mipatuasik og 10 alang sa Air21 nga nagbitbit karon og 6-9 win-loss record.

Samtang si Mark Macapagal, kinsa mirehistro og career-high 23 puntos, 14 sud sa fourth quarter mao usab ang nangulo sa pilderong Kings nga nagtangag og 6-8 win-loss record.

Mga iskor:

Air 21 (107) - Y. de Ocampo 17, R. de Ocampo 17, Padilla 15, Se 12, Arboleda 11, Telan 11, Canaleta 10, Avenido 8, Dacia 6



Ginebra (100) - Macapagal 23, Menk 19, Ferreria 15, Helterbrand 13, Holper 11, Sotto 11, Salvacion 9,Salangsang 6 uarterscores:24-17, 48-47, 84-69, 107-100