Tako sa mga professional

Ang tako usa ka mahinungdanong kahimanan sa pagdula og bilyar. Kun tirahan nimo ang mga bola sa ibabaw sa billiard table nga dili tako ang imong gamiton, dili kana matawag og billiard. Kay ang pagdula og billiard nagkahulogan man og paggamit sa tako. Kay ang kahulogan sa billiard mao ang lamesa, bola ug tako.

Karon, niay magbabasa ning lindog nga nag-text kanako nga nagkanayon: "Can you mention sa brand sa tako or cue ssticks nga gigamit sa mga professional players. I-apil pud ang weight, usage and other features. Thanks." -- 0916-4874539

* * *

Ang mga propesyonal nga magdudula magamit og managlahi nga brand sa tako. Depende kun unsay ilang magustohan ug kun unsay haom sa ilang estilo sa dinulaan. Depende pud kini sa tako nga komportable sila sa paggamit.

Makadaghan na nako balik-balika dinhi nga si Efren 'Bata' Reyes, ang nabantog nga The Magician sa billiard sport, migamit sa tako nga Meucci 21 oz., 12.5 mm shaft. Kini man gud ang tako nga haom kaayo sa iyang estilo. Komportable siya sa paggamit niini.

* * *

Apan kining maong tako dili maoy gigamit sa ubang propesyonal nga bilyarista. Ang ubang magdudula migamit sa tkao nga Minnesota Fats. Daghan sab ang ganahang mogamit niining maong tako kay mohaom kini sa ilang estilo.

Dili man gud kinahanglan nga mogamit ka sa tako nga gigamit ni Reyes aron matawag ka nga propesyonal nga magdudula. Labaw nang wala kinahanglana nga mogamit ka sa iyang tako aron ka mahanas. Ang pagbanos mo sa sapatos ni Reyes wala magpasabot nga ikaw mao na si Reyes.

* * *

Kun komportable alang kanimo ang paggamit sa tako nga maoy gigamit ni Reyes, mas maayo. Apan kun dili, nganong kini man gyud ang imong gamiton? Mangita ka'g laing brand sa tako. Mangita ka'g alternatibo. Seguroa gyud nga mohaom kini sa imong estilo sa dinulaan aron epektibo ang imong pagdula.

Kadaghanan sa mga propesyonal migamit sa tako nga ang feature anaa sa 18 to 20 ounces. Pero ang kang Reyes misobra niini kay 21 oz. man ang tako nga iyang gigamit. Okey ra man kana kay wala man gayoy espisipikong lagda kalabot sa tako nga gamiton sa professional billiards. Gawas lang kaha sa pipila ka torneyo nga nag-impose og kaugalingon nilang polisiya sa dula.

* * *

Ang shaft size sa tako nga gigamit sa kadaghanan sa mga propesyonal nga magdudula anaa sa 12 ngadto sa 14 mm. Nahasibo dinhi ang kang Reyes kay 12.5 mm man ang size sa shaft sa iyang tako. Sa tinuod lang, daghang mga magdudula nga migamit sa tako nga may shaft size nga 12.5 ngadto sa 13.5.

Ayaw isipa nga ang tako sa propesyonal lahi kay sa atong tako. Nakagamit ra usab sila sa samang mga tako nga atong gigamit. Ang nakalahi lang nila kay eksakto na sila sa disiplina maong gitawag sila'g professional.

* * *

(Text sa 0910-8105522)