Jaca makigbinukbukay ni Honmo

Tinguha ni Jimrex Jaca sa RWS Stable nga mosakmit sa ikaduha niyang Oriental and Pacific Boxing Federation title sa ilang binakbakay batok sa Hapon nga si Nobuhito Honmo alang sa bakanteng OPBF super featherweight title karong adlawa didto sa Korakuen Hall sa Tokyo, Japan.

Mao kini ang ikaduhang higayon nga mo-away si Jaca alang sa OPBF title. Naghari siya kanhi isip OPBF super bantamweight champion, apan nahuboan sa iyang bakus bisan pa og wala siya kakatkat sa ring gumikan kay overweight kini atol sa iyang pagdepensa batok ni Yasuo Kunimi niadtong Mayo 30, 2004 didto sa Kanazawa.

Si Jaca miyukbo ni Kunimi sa ikapitong hugna niadtong higayona. Mao pa lamang kadto ang pilde ni Jaca sa 27 ka away nga naglangkob og usa ka pilde ug 11 ka daog pinaagi sa knockout.

Si Jaca, nga lumad gikan sa Sibulan, Negros Oriental, impresibo sa miagi niyang away nga mao sab ang iyang US debut gumikan kay gipakamang niini ang Meksikanong si Geronimo Hernandez sa unang hugna sa undercard sa Pacquiao-Morales II niadtong Enero 21 didto sa Thomas & Mack Center sa Las Vegas, Nevada.

Sa iyang bahin, ang 29-anyos nga si Honmo nagtangag og 27-4-2 win-loss-draw record. Midaog siya sa katapusan niyang lima ka away pinaagi sa desisyon pulos didto sa Korakuen Hall.