Pinoy netter namayagpag sa Sri Lanka

Colombo, Sri Lanka -- Itinaas ng Pinoy na si Francis Casey Alcantara ang kanyang katayuan bilang Asia’s top 14-under player matapos na isubi ang singles at doubles titles sa Australian Open-sponsored Asian 14-Under Series Week 2 sa Sri Lanka Tennis Association Tennis Center claycourt noong nakaraang Linggo.

Inilabas ni Alcantara, tubong Malaybalay, Bukidnon ang kanyang matikas na porma upang talunin ang world juniors No. 112 na si Vishwesh Sinha ng India, 6-1, 6-3 sa single final at nakipagtambal sa Malaysian na si Juan Los Santos upang kunin ang doubles title laban sa third seeds pair na sina Sai Teja Paladagu at Sinha, 6-3, 6-4.

Umusad sina Paladagu at Sinha sa final matapos ang 7-5, 4-6, 6-1 tagumpay laban sa second seed duo na sina Arvind Fernando at Iridika Wettasinghe ng Sri Lanka.

"I’m happy to win again. I think that I’m in my best form right now," wika ng 14-year-old na si Alcantara, isang high school sophomore sa Xavier University sa Cagayan de Oro City. Noong nakaraang linggo, siya ay nagwagi ng singles at doubles titles.