Ang Mandaue City nga gipaluyohan ni Mandaue City Sports and Development Commission chairperson Cheryl Ouano, mitapos sa ilang kampanya pinaagi sa pagmakmak sa Aloguinsan/Carcar, 3.5-.5 aron pagsakmit sa P10,000 nga ganti bitbit ang 23.5 puntos.
Nangulo sa kampanya sa Mandaue mao ang Sugbuanong IM nga si Richard Bitoon, nga maoy miangkon og gold medal sa board 1 human nakatigum og 6.5 puntos. Gitabla ni Bitoon ang katapusan niyang duwa batok ni NM Leonardo Alidani.
Apan sa katapusang hugna ning seven-round Swiss system nga torneyo, ang mga kauban ni Bitoon padayong nangharos ubos sa pagpangulo ni Merben Roque nga mipakaging ni Glicel Gipega sa Aloguinsan.
Si Kim Steven Yap mipaluhod ni Rey Loquez sa board 3, samtang si Jobannie Tabada mipakgang ni Rey Flores sa board 4.
Si Roque mao lamang ang bugtong player nga miharos og daog sa pito ka duwa hinungdan nga siya maoy nakaangkon sa bulawang medalya sa board 2. Si Erwin Ababat sa Team Cebu City A maoy labing maayong player sa board 3, samtang si Carlos Moreno III sa San Fernando A maoy nanghawod sa board 4.
Ang Tuburan ug Cebu City A pulos mitapos og 18.5 puntos, apan ang Cebu City A maoy mipahiluna sa ikaduhang dapit gumikan sa winner-over-the-other rule.