Fingerprint sa bomba nailhan

Latent print nga nakuha diha sa bombang gibutang sa duha ka mga napatay nga gidudahang miyembro sa Rajah Sulaiman Movement sa SM department store niadtong milabay'ng Huwebes mitakdo sa usa sa mga suspek.

Ang Deputy Regional Director for Operations chief, Sr. Supt. Lani-O Nerez sa pakighinabi sa Banat News sa telepono kagahapon mibutyag nga mi-match ang latent print ni Ali Usop alyas Datu Ismael Usop sa nakuhang latent print diha sa usa ka parte sa maong bomba.

Sumala pang Nerez nga ang grupo sa Bomb Data Center pinanguluhan sa naila lang sa ngalan nga Supt. Ferro misusi sa mga parte sa maong bomba diha sa PNP Regional Crime Laboratory kagahapon.

"Naay findings ang mga taga crime lab nga gihatag diri nako nga ni-match sa prints ni Ali Usop gikan sa nakuhang latent prints diha sa bomba ," asoy pang Nerez.

Si Usop ug kaubang si Datu Niel Ulama alyas Viktor Ulama napatay sa engkwentro niadtong gabhiuna diha sa dalan A.Soriano sa North Reclamation Area human makigpinusilay sa mga sakop sa CCPO.

Tuyo sa mga bomb experts nga makuhaan og detalye ang pagkahimo sa maong bomba aron magamit sa mga mosunod nga adlaw isip basehanan kung dunay susamang mahitabo sa umaabot sumala pang Nerez.

Itandi ang maong bomba sa nauna nang mga bombang nasakmit sa kapolisan ug kadtong mga tipaka sa napabuto nang mga bomba sa RSM ug ubang grupong terorista dinhi sa Pilipinas aron masubay kung kinsang partikular nga grupo gyud ang mitanom niini.

Samtang giangkon ni Nerez nga dunay pagkaparehas sa pamaagi paghimo sa RSM og bomba ang narekober diha sa SM gumikan sa nakitang "signature."

Si CCPO director Melvin Gayotin sa pakighinabi nagkanayon nga ang nakitang pagkaparehas sa "signature" sa RSM pagkahimo sa bomba wala kini magpasabot nga 100 porsiyento mao gyud og pagkaparehas gumikan kay nag-agad man ang grupo sa kung unsay "available" nga materyales nga mahimong gamiton.

Si Nerez midugang nga hangtud karon ila pang gisubay kung asa napalit sa mga suspek o ba kaha giunsa pagpalusot sa mga suspek ang maong mga materyales ilabi na ang duha ka M76 rifle grenades nga makita ra sa militar. Samtang ang mga baterya, butane ug mga wire mahimo man kining mapalit sa mga hardware.