Abyon nasangit sa paril

Usa ka abyon ang nahagsa ug midaro sa usa ka awto human masangit sa usa ka paril diha sa Sitio Tacan, Barangay Ibo dakbayan sa Lapu-Lapu kagahapon sa hapon diin ang piloto ug ang pasahero niini swerteng wala magrabehi pagkahitabo.

Ang maong abyon usa ka two seater Cessna 150 type nga abyon nga gipanag-iya sa Adventure Flight Education and Sports diin ang piloto mao si Capt. Mark Galasinao uban ang usa ka tinun-ang Koreyano nga si Lee Chong Gee.

Matud pa ni Capt. Jessup Bahinting sa pakighinabi sa Banat News usa sa mga tag-iya nga mga alas 3:30 sa hapon kagahapon milupad ang maong abyon nga RP-C269 luwan si Capt. Galasinao ang flight instructor ug ang Koreyano alang sa usa ka training program sa pagpalupad og abyon.

Base sa pamahayag ni Capt. Galasinao kalit nga nawagtangan og puwersa ang makina dihang mihimo na sila og final approach maneuver aron unta motugpa sa Mactan Cebu International Airport .

Gumikan sa maong hitabo nawad-an na og kontrol ang abyon ug ulahi na kaayo aron pagbawi niini pasaka og balik hinungdan nga nasangit sila sa koral sa runway dayong mitiurok ngadto sa dalan sa Sitio Tacan sa samang barangay diin naigo usab ang usa ka Honda Civic nga gipanag-iya ni Salvador Villanueva Abadesco HR manager sa San Miguel Corp. hinuon luwas kini sa kuyaw nga kahimtang.

Si Capt. Galasinao nahiagum og samad sa iyang ilong samtang ang Koreyano nga si Gee gagmay'ng garas lang sa kalawasan ang nahiaguman niini ug parehong gidala sa Mactan Doctors Hospital ug luwas na usab sa kakuyaw .

Matud pa ni Capt. Bahinting nga swerte nga wa mabangga sa ikaduhang koral ang maong abyon diin posibleng adunay kinabuhing makalas.

Samtang gikatakdang mohimo og dugang imbestigasyon ang mga kadagkuan sa Air Transportation office kun ATO kabahin sa insidente.Ang Pag-Asa Mactan kagahapon mipahibalong di kaayo tantong kusog ang hangin ug wala na usab ang grabeng pagdag-om nga dinala sa bagyong Caloy.