Camacho, Eroles misidlak

Bisan sa hulga sa panahon, ang duo nilang Jenevieve Camacho ug Arthur Eroles sa Dancesport-Team Cebu City nagpabiling nanginit human nila gidominar ang premiere open category sa 2nd Southern Philippines DanceSport Championship nga ulohan og "DanceSport sa Sugbu" diha sa Waterfront-Cebu City Hotel.

Sila si Camacho ug Eroles nanghawod sa latin discipline batok sa lig-ong mga kaatbang.

Ang paresan nilang Larry Iguidez ug Lilibeth Lalic nahimutang sa ikaduhang dapit, samtang sila si Michael Gualvez ug Carla Rona Becaro maoy nitungtong sa ikatulo nga dapit.

Ang igsuong laki ni Jenevieve nga si Charlie ug iyang pares nga si Jaja Abel, nahimutang sa ikaupat nga dapit, samtang ang laing Cebuano bets nga sila si Israel Rona ug Jennifer Amahan maoy mikompleto sa top-five.

Sa modern standard discipline, ang Ocaña siblings, Brian Joseph ug Karla Stephanie maoy miangkon sa korona human gipilde ang magtiayong Joel ug Annabelle Madera.

Ang nagsunod nga duha ka luna naangkon nilang Leonardo Telebangco ug Rebecca Vasaycaje sa DTCC alang sa ikatulong dapit ug nilang Jojie ug Jonah del Rosario alang sa ikaupat.

Ang mga Sugbuanon milangkat og tulo sa upat ka special awards sa open category.

Sila si Jojie ug Jonah del Rosario giproklamar nga best in tango, samtang si Bernie Tumarong ug Miljane Camacho misidlak og maayo sa slow waltz.

Sa laing side, si Israel Rona ug Jennifer Amahan maoy nidaog sa best in rumba award, samtang si Larry Iguidez ug Lilibeth Lalic nipakita sab og maayo sa chachacha.