Cebu bets moapil sa Subic Bay Triathlon

Mga banggiitang triathletes dinhi sa Sugbo ang mag-atubang og lig-on nga hagit sa pag-ulbo sa 2006 Legenda Subic Bay International Triathlon karong adlawa didto sa Boardwalk Area sa Subic Bay Freeport.

Ang mga Sugbuanon nga mokumbati mao ang mga sakop sa nasudnong koponan nga sila si Gerrie Calinawan ug Dec Rowan Fernandez, uban nilang former RP bet Abet Biagan ug sa Mandauehanong si Trino Rey Trasmonte.

Si Calinawan mokumbati sa elite male ug sa under-23 sa Olympic distance course nga adunay 1.5 kilometer swimming, 40-kilometer biking ug 10-kilometer running libot sa freeport.

Sa iyang bahin, si Fernandez gipaabot nga makig-rematch sa iyang higpit nga karibal ug reigning national junior champion Joash Serrano alang sa junior sprint title nga adunay 750m swim, 20K bike ug 5K run.

Sa age-group competition, si Biagan sa Cebu City ug Trasmonte sa Mandaue City pulos mowadwad sa 30-34-age group.