Mandaue mo-host 'out-of-town' PBA game

Sa labing unang higayon, ang dakbayan sa Mandaue mo-host og "out-of-town" Philippine Basketball Association (PBA) game diin magtige mao ang crowd-darling Brgy. Ginebra Kings ug Air21 Express karong Mayo 20 diha sa Mandaue City Cultural and Sports Complex.

"It's already confirmed. We're going to host a PBA game pitting Ginebra against Air21 Express on May 20 at our sports complex," matud pa ni Mandaue City Sports Development Commission chairperson Cheryl Ouano.

"Just like the major events we staged in the past, we will do everything to the best of our capability to ensure the success of the forthcoming PBA game, which is a first in the history of Mandaue sports," dugang pa ni Ouano.

Dili pa dugay, ang Mandaue malampusong nipahigayon sa "Bad Boy Tour" diin ang NBA Legends nga gipangulohan ni Dennis Rodman nakigsangka batok sa San Miguel Corporation All-Stars sa usa ka exhibition game niadtong Abril 28.

Sumala pa ni Ouano nga ang mga tiket sa engkuwentro tali sa Ginebra ug Air 21 mapalit na sunod semana.

Sa kasamtangan nga PBA standings, ang Gin Kings nahimutang sa ikapitong dapit bitbit ang 4-6 win-loss record, samtang ang Air 21 nagtangag og baraha nga 4-7 win-loss record.

Ang Ginebra nagtinguha nga makapanimalos sa ilang 98-109 nga kaparotan sa Air 21 sa miagi nilang kumbati niadtong Marso 24 didto sa Cuneta Astrodome.

Mangulo sa opensiba sa Kings mao sila si Erik Menk, Rommel Adducul, Jayjay Helterbrand ug Mark Caguioa.

Ilang atbangan ang puwersa sa Air 21 nga gilangkuban usab nilang Renren Ritualo, Mark Telan, Ronald Tubid, Yancy ug Ranidel de Ocampo ug ni back-to-back PBA Slam Dunk champion Nino Canaleta.