Cebu batok Manila

Duha ka inilang college basketball teams gikan sa duha ka dagkung liga sa kaulohan ang mo-anhi dinhi sa Sugbu aron mopahigayon og exhibition games batok sa mga pambatong koponan sa Cebu School Athletics Foundation, Inc. (CESAFI) karong Mayo 7 - 12 diha sa University of the Visayas gym.

Si UV Green Lancers head coach Elmer 'Boy' Cabahug mipadayag sa Banat News nga ang mga koponan nga mo-anhi sa Sugbu mao ang Ateneo de Manila University Blue Eagles sa Universities Athletics Association of the Philippines (UAAP) ug ang College of St. Benilde Blazers sa National Collegiate Athletic Association (NCAA).

Matud pa ni Cabahug nga gawas sa five-time CESAFI champion UV Green Lancers, ang Ateneo ug St. Benilde gikatakda sab nga makigharong batok sa University of Cebu (UC) Webmasters ug University of San Carlos (USC) Warriors.

Midugang si Cabahug nga dad-on sab dinhi sa St. Benilde ang ilang women's team aron iparang sa mga babayeng basketbolista sa UC, USC ug sa University of San Jose-Recoletos (USJ-R).

Sumala pa ni Cabahug nga ang pag-anhi sa Ateneo ug St. Benilde dinhi kabahin sa ilang pangandam alang sa umaabot nga UAAP ug NCAA season.

Mogiya sa Ateneo Blue Eagles mao si 10-time PBA champion coach Norman Black, samtang modala sa St. Benilde Blazers mao si Caloy Garcia.

Si Garcia maoy mihulip sa dapit ni Tonichi Yturri nga gibuhian sa St. Benilde gumikan sa kapakyasan niini pagpasud sa 2000 NCAA champion Blazers ngadto sa semifinals sud sa duha na ka tuig niining pag-coach.