Taguig misakmit liderato sa north

Gidominar ni Marlon Legaspi ang nanghinapos nga bahin sa katapusang kuwarter aron paghatod sa Forward Taguig ngadto sa kadaugan batok sa Spring-Parañaque, 81-78 sa miaging gabii sa nagpadayong aksiyon sa 2006 Guerrero Brandy-NBC national basketball championship didto sa C.P. Tiñga Sports Complex sa Taguig.

Ang "main man" sa Taguig nga si Marc Victoria wala makapadayon sa aksiyon dihang nasunggo kini atol sa ilang panagbangga ni Mar Reyes sa Spring sa tunga-tungang bahin sa katapusang kuwarter. Si Legaspi maoy mikontrolar sa Taguig pinaagi sa paghipos og walo ka sunod-sunod nga puntos aron pagpa-abante sa Taguig, 79-74 sa nahabiling 1:07.

Ang Taguig ni mayor Freddie Tinga ug coach Danny Gavieres wala mohunong sa pagpabuhagay sa ilang nagkayong opensa ug sukad niadto ang Spring-Parañaque wala na gyud makahimo pagsakmit sa labaw hangtod nga napupos ang oras.

Sa maong kadaugan, ang Forward Taguig misakmit sa liderato sa Northern Division bitbit ang 3-1 win-loss record samtang ang Spring-Parañaque natagak ngadto sa 2-2 win-loss rekord.

Sa laing bahin, ang Bacchus/Harbour Centre-Manila misakmit sa ilang ikatulong daog sulod sa lima ka duwa dihang ilang gitiwasan ang Laguna-Sta. Rosa Pistons sa iskor nga 79-69.