Santillan modepensa

Bug-at nga tahas ang sagubangon ni Rev "The Gentle Giant" Santillan sa RWS Stable sa iyang pagdepensa sa Oriental and Pacific Boxing Federation (OPBF) welterweight title batok sa way pildeng Japanese challenger nga si Hiroshi Yamaguchi karong adlawa didto sa Korakuen Hall sa Tokyo, Japan.

Ang 27-anyos nga si Yamaguchi, kinsa nakabintaha og usa ka pulgada nga gitas-on batok ni Santillan, way pilde sa 15 ka away ug usa ang tabla ug sa 10 ka daog pinaagi sa knockout.

Hinuon ang Hapon wala pa makasangka og mga tang-an nga kontra sukwahi ni Santillan nga nakigharong na ug gani gipalukapa pa niini ang mga banggiitang Hapon nga welterweight sama nilang Hiroshi Watanabe, Kazuhiko Hidaka ug Daigoro Yamamoto.

Sa iyang bahin, si Santillan, nga nagtangag og 22-2-1 win-loss-draw record uban ang 16KOs, modepensa sa labing unang higayon human ma-angkon niya og balik ang iyang trono pinaagi sa pagpakamang sa Hapon nga si Kazuhiko Hidaka sa ikawalong hugna sa miagi niyang away niadtong Disyembre 3 sa miaging tuig didto sa Korakuen Hall.

Gipaabot nga mo-abiba ni Santillan sa ringside mao ang iyang manedyer nga si Rex "Wakee" Salud ug ang iyang trainer nga si Brix Flores.