Garfield miarangkada sa CABA hoop

Padayong nag-una ang Garfield Black Five sa liderato dihang ilang gitunolan og laing kapildihan ang gidaog-daog nga CABA Red sa iskor nga 77-66 niadtong Lunes sa gabii sa elimination round sa 2006 First Conference Basketball League sa Cebu Athletics Basketball Association (CABA) diha sa San Nicolas Sports Complex, ning siyudad.

Grabe kaayo ang gipakitang duwa sa duha ka kampo ug gani kapila ka higayon nagtabla kini sa iskor ug kanunay usab kini nga nag-ilog og labaw hangtod nga nagtabla kini sa iskor, 54-54 paghuman sa third quarter. Katapusang nagtabla ang duha ka kampo sa iskor, 64-64 sa nahabiling kuwatro minutos sa katapusang kuwarter human nasulod ang layup ni Danny Estrera sa Garfield.

Ang undergoal shot ni Ting Enicuela maoy nakapalabaw sa Garfield, 66-64 ug giinat kini ngadto na sa pagposte sa ilang ikalimang sunod-sunod nga kadaugan.

Sila si Enicuela ug Estrera mi-iskor og 16 ug 15 puntos matag usa uban sa suporta nilang Junnie Cambonga, Edel Zapanta ug Marlon Lumayag.