Red Bull nakabangon, Air21 gisungag

Namunga ang mga paningkamot sa Red Bull Barakos dihang ilang gipilde ang Air21 Express sa iskor nga 112-98 sa nagpadayong Gran Matador Brandy PBA Philippine Cup kagabii didto sa Astrodome.

Ang "trapping defense" maoy gihimong taming sa Barakos aron makabangon kini human gipilde sa San Miguel Beer niadtong miaging Sabado aron paglansang sa ilang tulo ka daog batok sa duha ka pilde.

Gawas sa ilang walay puas nga depensa, wala say tihik-tihik nga mipatuasik sa ilang puntos ang Barakos. Gani pito sa mga magduduwa niini nakakuha og double figures.

Sila si Lordy Tugade, Larry Fonacier, Enrico Villanueva, Paolo Bugia, Mick Pennisi, Celino Cruz ug Cyrus Baguio mitali og double-digit. Ug ang pinakagamay'ng puntos nga namugna sa Red Bull mao ang kang Topex Robinson sa iyang sayes puntos.

"Air21 is always dangerous specially when Renren Ritualo is hitting his three-pointers. I became worried when Renren started to hit his shots. But what's good was that when Renren scored from afar, we defended the posts very well. That balanced things for us," matud ni Red Bull coach Yeng Guiao.

Si Ritualo maoy nangulo sa tanang scorers uban ang 24 puntos, apan wala na kini makapuntos sa payoff period nga maoy nakaingon sa ilang ikaupat nga kapildihan sud sa unom ka duwa.