Barrera gihagit ni Harrison

Dihang ang kampo sa Meksikanong si Marco Antonio Barrera nagpunay og hagit alang sa usa ka rematch batok ni Manny Pacquiao, lain sab nga boksidor ang nagpangagot nga makigbinukbukay ni Barrera.

Kini gumikan kay si WBO featherweight champion Scott Harrison, pinaagi sa iyang amahan ug trainer nga si Peter, mipadayag sa iyang tinguha nga makigharong batok ni Barrera ning tuiga.

Apan sa dili pa mahitabo ang maong away, si Harrison gikinahanglan una nga manalipod sa iyang korona batok sa walay pilde ug kanhi WBO super bantamweight champion nga si Joan Guzman karong Mayo 20 didto sa Belfast.

Si Harrison mag-atubang sa gituhoan sa kadaghanan nga labing malisud nga away sa iyang career.

Hinuon ang iyang amahan wala mabalaka niini gumikan kay salig kaayo siya sa katakos sa iyang anak nga mapanalipdan ang iyang trono.