Pacquiao-Larios fight gitakda sa Hulyo

Kompirmado na.

Ang garbo sa mga Pinoy nga si Manny Pacquiao makigsangka batok sa Meksikanong si Oscar Larios sa Araneta Coliseum karong Hulyo.

Naselyado ang maong kasabotan human gipirmahan ni Pacquiao ang kontrata niadtong Huwebes sa gabii uban sa iyang Amerikanong manedyer nga si Shelly Finkel, Atty. Nicholas Khan ug trainer Freddie Roach.

Ang mga handlers ni Pacquiao miabot sa miaging adlaw dala ang kontrata nga nauna nang gipirmahan ni Larios dili pa lamang dugay.

Si Pacquiao nakigtagbo ni Finkel sa usa ka closed-door meeting nga milungtad og usa ka oras.

Ubos sa kontra, si Larios modawat og $450,000. Wala pay opisyal nga pamahayag kabahin sa premyo ni Pacquiao, apan gituohan nga ang People's Champion mobulsa og dili mominus sa $1 million.

Matud pa ni Pacquiao nga lagmit ang away mahitabo karong Hulyo 9 o Hulyo 2.

Sa iyang bahin, si Roach nagkanayon nga silang Pacquiao ug Larios magbinakbakay sud sa 12 ka hugna ubos sa 130 lbs. (super featherweight) division.

Sigun sa plano, si Pacquiao magbansay-bansay sud sa tulo ka semana karong bulan sa Mayo didto sa Wild Card Gym in Hollywood. Human niini, si Pacman mag-ensayo sud sa usa ka semana karong Hunyo sa iyang training camp didto sa Baguio City.