Pinoy batok Pinoy

Dakung posibilidad nga mahinayon ang usa ka talagsaong hitabo diin ang usa ka Pinoy makigsangka batok sa usa ka Pinoy sa usa ka world championship boxing match.

Kini human gibasura ni World Boxing Councill mandatory light flyweight challenger Juanito Rubillar ang tanyag nga mo-away siya alang sa interim nga bersiyon sa WBC belt batok ni Nelson Dieppa kay buot niining hagiton ang kampiyon nga si Brian Viloria, usa ka Filipino-American.

Si Karl Freitag sa Fightnews.com nagkanayon nga gihatagan ang duha ka kampo nga mohimo og negosasyon hangtud sa Abril 7, ning tuiga ug inig kahuman ipahigayon dayon ang purse bid.

Sa sayo pa, ang Meksikanong promoter nga si Fernando Beltran mihaylo og $25,000 nga ganti alang ni Rubillar aron sangkaon si Dieppa sunod bulan didto sa Puerto Rico human niya masayri nga nakasinati si Viloria og injury sa tuo niining kamot human sa away niini batok ni Jose Antonio Aguirre.

Apan ang manedyer ni Rubillar nga si Gabriel 'Bebot' Elorde, Jr. mipahibawo ni WBC president Jose Sulaiman nga wala silay laing gusto sa sunod nga away kundili ang mandated title bout batok ni Viloria.