"It's confirmed. We've just signed the contract this morning (yesterday) for Bautista and Gorres to fight in the US this May," matud pa sa tinahod nga amahan sa ALA Stable nga si Antonio 'Bidoy' L. Aldeguer.
Apan sukwahi sa sayong mga taho, sila si Bautista ug Gorres mo-away sa managlahing petsa.
Si Bautista, ang kasamtangang WBO Asia Pacific bantamweight champion, mopakita sa iyang abilidad sa undercard sa pagdepensa ni Marco Antonio Barrera sa iyang WBC super featherweight title batok ni Rocky Juarez karong Mayo 20 didto sa Staples Center sa Los Angeles, California.
Sa iyang bahin, si Gorres mopakita sa iyang kabangis sa undercard sa WBO bantamweight title defense ni Jhonny Gonzales batok ni Fernando Montiel karong Mayo 27 didto sa MGM Grand sa Las Vegas, Nevada.
Dugang pa sa maong maayong balita mao nga ang away ni Bautista maapil sa "pay- per-view," buot pasabot niini nga ang away sa garbo sa Bohol makita live sa tibuok kalibutan.
Alang kang Gorres, nagdanga-danga na ang usa ka world title fight kay matud pa ni Aldeguer kun molampus si Montiel pag-ilog sa korona ni Gonzalez, hayan si Gorres makigharong ni top contender Martin Power sa England alang sa bakanteng WBO super flyweight title.
Sa laing bahin, si Bautista mikatkat gikan sa No. 11 ngadto sa No. 7 sa WBC bantamweight division, samtang wa sab magpabitin ang Sugbuanon nga si Malcolm Tuñacao nga misaka ngadto sa No. 4.
Lain pang Sugbuanon nga si Randy 'Kumong Bato' Suico ang nakapuwesto dayon sa No. 10 sa WBC lightweight division bisa'g bag-o pa lang niya gibakantihan ang iyang trono isip OPBF super featherweight champion.