5 Teams nagpanikad sa MVBA 1st conference

Nagpanikad na nga mopakita'g aksiyon ang lima ka teams sa Visayas Division sa ipahigayong ML Kwarta Padala Mindanao Visayas Basketball Association (MVBA) First Conference karong Sabado didto sa Barba Sports Complex sa dakbayan sa Toledo.

Ang bugtong duwa tali sa Toledo City Landmasters ni businessman/realtor Jose Soberano III ug Mantawi Traders ni Mandaue City Mayor Thadeo Ouano sugdan sa alas 5:30 sa hapon.

Usa ka simpleng opening rites ang ipahigayon diin gilaumang motambong si MVBA chairman ug Misamis Oriental Governor Oscar Moreno ug Toledo City Mayor Arlene Z. Espinosa uban sa mga kadagkoan sa maong liga.

Sa Domingo, ang Landmasters modulhog sa dakbayan sa Sugbu aron ilang atakihon ang M. Lhuillier-Cebu City ni Michel Lhuillier sa alas 5:30 sa hapon diha sa Cebu Coliseum.

Sa Miyerkules, ang turno na sab sa Mantawi Traders nga mo-host batok sa M. Lhuillier-Cebu City Jewelers diha sa Mandaue City Sports and Cultural Center.

Lain pang mga partisipanteng koponan sa MVBA Visayas mao ang Bacolod-West Negros College ug Toyota-Iloilo Warriors.

Ang MVBA Visayas action magsubay og double round robin, home-and-away format. Usa ka team ang mataktak human sa classification round.

Sa semifinals, ang No. 1 ug No. 4 mag-abot alang sa best-of-three series sa samang paagi, ang No. 2 ug No. 3 mao usab ang mag-abot sa ila usab nga best-of-three series.

Ang modaog sa maong duwa maoy mag-abot sa best-of-three MVBA Visayas championship.