Orcollo nigilak sa iyang unang US Tournament

Ang garbo sa Bislig, Surigao del Sur, Philippines nga si Dennis Orcollo kinsa nisalmot sa US pool nipakita dayon sa iyang abilidad aron paghakot og ganti.

Si Orcollo nipakyaw sa siyam ka racks aron pagbuntog ni kanhi world champion Oliver Ortmann sa Germany, 10-6, ug ingon aron paghari sa 2006 International Pool Tour (IPT) 8-Ball Shootout qualifier didto sa Times Billiards Hall sa Bellflower, Los Angeles, California.

Suwerte kaayo si Orcollo tungod kay mao pa kini ang iyang unang higayon pagsalmot sa ingon niini nga torneyo,

Sa iyang pagmartsa sa championships, iyang gipalagpot ang mga banggiitang players nga iyang nakasangka, silang Rob Hart (10-8), Roman Hybler (10-6), Michael Schmidt (10-5), Richard Broumpton (10-3) ug Goh Takami (10-3).

Sa maong kadaugan, si Orcollo naka-angkon og luna sa IPT event qualifiers ug nga nakig-uban nilang Alex Pagulayan ug American Jason Miller .

ain pang mga Filipinos nga nakig-bugno sa maong torneyo mao silang Santos Sambajon, Ramil Gallego, Antonio Lining ug Warren Kiamco.