Mindanao Visayas Basketball Association opening: Manny Pacquiao motambong sa seremonyas

Si Pinoy boxing superstar Manny Pacquiao motambong sa seremonyas sa pagbukas sa labing unang season sa Mindanao Visayas Basketball Association (MVBA) diin 11 ka teams ang mosalmot karong Pebrero 25 didto sa Mindanao State University-Iligan Institute of Technology Gym sa siyudad sa Iligan.

Ang MVBA nilang Raul "Yayoy" Alcoseba ug Michel Lhuillier aron kahatagan og higayon ang mga Bisaya nga mga basketbolista nga mahashas og maayo ang ilang abilidad ug ingon man i-andam sila sa mas dagkong liga.

Mismo si Pacquiao ang mipasalig ni Alcoseba nga mobiyahe siya sa Iligan aron suportaan ang kaugalingon niyang koponan nga mao ang Pacman-General Santos.

Ang Pacman usa sa lima ka teams nga naglangkob sa MVBA Mindanao division. Sangkaon niini ang silingan niining Montana Pawnshop-Davao sa pasiunang duwa nga gikatakda sa alas 5:30 sa hapon.

Sa main game sa alas 7:30 sa gabii, magtige ang host team Iligan City ug ang bisita niining Misamis Oriental.

Ang Cagayan de Oro Rapids maoy nagkumpleto sa mga Mindanao teams.

Ang M. Lhuillier Kwarta Padala-Cebu City Jewelers ni Michel Lhuillier maoy nangu sa unom ka teams sa Visayas division. Uban sa Jewelers mao ang Toyota-Iloilo, West Negros College-Bacolod, Toledo City, Mandaue City, ug Tacloban City.

Ang kumbati sa Visayas mosikad karong Marso 11 didto sa dakbayan sa Toledo.