UV Lancers midaog batok sa University of Zamboanga

Sa ikaduhang higayon, ang University of the Visayas Green Lancers mipakita na usab sa ilang kabangis dihang ilang gilubong ang University of Zamboanga sa iskor nga 88-47 sa bag-o pang gisugdan nga Philippine Basketball Federation Inc. (PBFI) National Students Championship kagahapon didto sa Rizal Memorial Coliseum.

Ang Lancers nga unang mimasaker sa University of Nueva Caceres, 110-31 sa miaging adlaw, nakakuha og maayong labok sa nagkahiusang pwersa nilang Jezar Esperat, Morsie Akad, ug Rino Berami kinsa nagkumbuya paghipos og 36 puntos samtang si Eulogio Lasala Jr. midugang og 14 puntos.

Ang UV Green Lancers kasamtangan na karong nagbitbit sa ilang walay buling nga win-loss rekord, 2-0.

Si coach Elmer "Boy" Cabahug wala migamit sa ubang tang-ang players niya sama nila ni Jayford Rodriguez, Ariel Mepaña ug Kim Calo. Ang tulo wala gipaduwa sanglit klaro man nga dominado kaayo nila ang duwa gawas nga sila unya ang himoong 'surprise blasters' alang sa UV.

Karong adlawa, ang UV Lancers naglaraw na usab nga mokulit og laing daog dihang ilang atubangan ang Manuel Luis Quezon University (MLQU) Stallions sa 1:30 sa hapon.

Gipaabot nga mogiya sa Lancers mao si CESAFI MVP nga si Mark Ababon.

Puntos matag-usa:

UV (88) - Lasala 14, Esperat 13, Akad 12, Berami 11, Santos 10, Mepaña 9, Rodriguez 6, Abelong 5, Calo 4, Ababon 2, Lanete 2

U. Zambo (47) - Sebastian 13, Dullin 11, Saavedra 10, Sebastian 6, Dela Cruz 2, Flores 1