Viloria milampos sa unang depensa

Si Fil-Am Brian Viloria milampus pagdepensa sa iyang WBC light flyweight title human brutal niining gikulata ang Meksikanong si Jose Antonio Aguirre aron pagkulit og unanimous decision nga kadaogan kagahapon didto sa Aladdin Resort sa Las Vegas, Nevada.

Mao kadto ang labing unang pagdepensa ni Viloria sa titulo nga iyang nasakmit pinaagi sa makalilisang niining pagpakatug sa Meksikanong si Eric Ortiz sud lamang sa usa ka hugna niadtong bulan sa Septiyembre sa miaging tuig didto sa Los Angeles.

Ang duha ka judges mi-iskor og 116-112 samtang ang usa ka judge mitali og 117-111 alang ni Viloria, nga mi-inat sa way pilde niyang baraha ngadto sa 19-0 uban ang 12KOs.

Si Aguirre, nga kanhi naghari isip minimumweight champion gikan sa tuig 200 hangtud sa 2004 nakatilaw sa ikalima niining kapildihan sa 39 ka away nga naglangkob og usa ka tabla. Mao kadto ang ikatulong sunod-sunod nga higayon nga napakyas si Aguirre pag-angkon og korona sa light flyweight division.

Bugtong konsolasyon ni Aguirre mao ang agresibo kaayo niining ataki sa ikatulong hugna hinungdan nga diriyot nga nagkalisang-lisang si Viloria.

Apan sukad niadto, si Viloria mao nay mikontrolar sa away hinungdan nga nabun-og og nagkadugo og maayo si Aguirre human sa away.

Nagkanayon si Viloria nga gusto niyang hagiton sunod mao si interim WBC flyweight champion Jorge "Travieso" Arce, nga usa sab ka Meksikano.