Darchinyan masaligong mapukan si Gabi

Si International Boxing Federation (IBF) flyweight champion Vic Darchinyan masaligon kaayo nga iyang pildihon ang Pinoy niyang challenger nga si Diosdado Gabi sa ilang 12-round title bout karong Marso 3 didto sa Chumash Casino Resort sa Santa Ynez, California.

"I will beat him," sigun sa taho ni Peter Kogoy sa Australian News.

"I am a much stronger fighter and I believe strongly in my ability," matud pa sa wala pay pildeng boksidor nga natawo sa Armenia apan tua na karon nagbase sa Sydney.

Kompiyansa kaayo si Darchinyan nga iyang mabuntog si Gabi gumikan kay naghisgut na siyang daan og away batok ni interim WBC flyweight champion Jorge "Travieso" Arce sa Mexico.

Ang trainer ni Darchinyan nga si Jeff Fenech, usa ka kanhi world champion, nanghambog sab nga iyang batos maoy labing maayong flyweight boxer karon sa tibuok kalibutan.

"People will see that I have the best flyweight in the world and the hardest punching flyweight in the world," dason pang Fenech.

"It is a very big step for Vic Darchinyan to be taking. His next fight will be in front of a worldwide television audience in the millions. With the step up comes added pressure but this kid (Darchinyan) handles pressure real well," dugang pa ni Fenech.

Si Darchinyan wala pay pilde sa 24 ka away nga naglangkob og 19 ka daog pinaagi sa knockout.

Hinoon impresibo sab si Gabi nga nagtangag og baraha nga 26-3 uban ang 18KOs.