Tagaytay nilihi og daog

Ang bag-ong miyembro sa NBC nga Batang Tagaytay nilihi dayon og daog sa 2006 National Basketball Conference Pre-Season Tournament human naka-ipsot sa kulbahinam nga kumbati batok sa Pagadian Explorers sa iskor nga 67-66 didto sa Tagaytay International Convention Center.

Ang Pagadian squad ni Mayor Sammy Co init kaayo nga mipabuhagay sa ilang nagkayong opensa ug ilang nadominar ang unang duha ka kwarter sa duwa.

Ang Explorers miabanti, 51-47 sa naghinapos nga bahin sa ikatulong kwarter sa duwa.

Apan ang host team nga maoy pinakaulahing expansion team ning maong torneyo, kalit lang nga misutoy kortesiya sa opensa sa ilang journeyman nga si Rodel Mallari kinsa mipusa og sunod-sunod nga 8 puntos aron pagpukaw sa opensa sa Tagaytay nga maoy nahimo nilang taytayan sa pagkulit og daog.

Ang mga beterano sa Explorers nga sila si Leo Bat-og ug Bong Marata nisuway unta og luwas sa ilang koponan human sila nilabaw og uno punto, 66-65, sa daginutong segundos sa duwa apan ang Batang Tagaytay isog kaayo nga nitubag dayon sa maong opensa ug nipasulod sa ilang kataposang dos puntos aron pag-ilog sa labaw, 67-66 sa nahabiling 5.2 segundos.

Ang Explorers may puruhan pa unta nga modaog sa maong duwa apan pakyas sila pagpasulod sa katapusan nilang posisyon.

Sa unang duwa, ang Spring Cooking Oil-Laguna ubos ni NBC president Nathaniel "Tac" Padilla nikulit sa ilang ikaduhang daug human ilang gilubong ang Bacchus/Harbour Centre-Manila, 102-83.

Si Danny Capobres maoy nangulo sa kadaugan sa Laguna sa iyang 16 puntos samtang silang kanhi National University Ariel de Castro ug Gilbert Neo nipuno og 15 puntos matag usa.