Mayol mi-TKO ni Trejo

Human ang garbo sa mga Pinoy nga si Manny Pacquiao maoy labing unang tawo nga nakapalukapa sa idolo sa mga Meksikano nga si Erik Morales, ang Sugbuanong si Rodel Mayol na sab maoy mikulit og kasaysayan.

Kini human si Mayol mipakatug sa Meksikanong si Lorenzo "Explosivo" Trejo sa ikaupat nga hugna sa ilang WBC minimumweight elimination bout sa miaging gabii didto sa Plaza de Toros sa Cancun, Mexico aron mamahimong labing unang Pinoy nga midaog didto sa Mexico.

Ang murag puthaw og kumo nga si Mayol mipakamang ni Trejo sa unang hugna unya hingpit nga gipatukay-ang ang Meksikano ginamit ang makabungog niyang uppercut sa ikaupat nga hugna.

Gawas nga naka-angkon og katungod nga maoy mamahimong mandatory challenger ni WBC 105-pound champion Eagle Kyowa, usa ka Thai nga tua na karon magbasi sa Japan, ang kadaogan ni Mayol nakahatag og dobleng blackeye ngadtong Morales, nga maoy manedyir ni Trejo.

Ang maong kalampusan sa Mandauehanon nga boksidor nagtawag na sab og usa ka dakong selebrasyon alang sa mga Pinoy, nga hangtud karon padayon pang naghudyaka sa makalisang nga pagpukan ni Pacquiao kang Morales.

"I am very happy for him (Mayol) and this only proves that Mexicans are unbeatable is nothing but a myth," matud pa sa tinahud nga boxing patron nga si Antonio "Bidoy" L. Aldeguer, nga mao kanhi ang naghupot ni Mayol.

"All Pinoy boxers need are good, honest managers who will give them a chance and they'll conquer the world. Rodel has that now and so with few others and they're showing the way," dugang pa ni Aldeguer. Ang 24-anyos nga si Mayol mi-inat sa way pilde niyang record ngadto na sa 22-0 uban ang 17KOs, samtang si Trejo nanaog ngadto sa 24-12 uban ang 11KOs.