Mayol masaligong modaog batok ni Trejo

Ang Sugbuanong si Rodel "Batang Mandaue" Mayol, rated No.1 minimumweight contender sa World Boxing Council ug World Boxing Organization, mipadayag nga masaligon kaayo siyang modaog batok sa Meksikanong si Lorenjo "Explosivo" Trejo sa ila unyang WBC elimination bout nga gikatakda karong Enero 28 didto sa Cancun, Quintana Roo, Mexico.

"Nakakita ko sa videotape sa usa sa iyang mga away. Fighter sab siya pero dili kaayo maayo. Sa tan-aw nako kaya ra nako siya pero di gyud ta mokompiyansa og maayo kay adto ra ba sa Mexico ang away," matud pa ni Mayol nga mao sab ang kasamtangang Oriental and Pacific Boxing Federation (OPBF) mini-flyweight champion.

" Ang ako ani praktis lang og maayo aron modaog. Kinahanglan gyud ko nga modaog kay mao na ni ang akong tsansa nga maka-away alang sa world title," dugang pa ni Mayol.

Sigun sa mando sa WBC sa miagi niining tigum didto sa Spain, ang modaog sa engkuwentro nilang Mayol ug Trejo maoy mamahimong mandatory challenger ni WBC minimumweight champion Eagle Kyowa sa Japan.

Si Mayol, nga gi-atiman na karon sa Hapon nga si Yasuo "Machang" Matsuoka, nagbansay-bansay didto sa Japan sud sa duha ka bulan apan dinhi na niya taposon ang iyang pag-ensayo sa Sugbu aron paglikay sa tugnaw kaayong panahon sa Japan.

Ubos sa makuting mata sa beterano niyang trainer nga si Brix Flores, si Mayol naka-sparring na og dul-an sa 100 ka hugna.

Sugod karon, nagbanos-banos lang og training si Mayol didto sa Flores Gym sa Mandaue City ug sa RWS Gym ni Rex "Wakee" Salud diha sa Brgy. Punta Princesa alang sa katapusang hunat sa hugtanon niyang preparasyon alang sa gihulagway niyang labing mahinungdanong kumbati sa iyang career.

"Mao ni ang labing importante nga away sa akong career sa pagka karon. Lisud nga tahas akong sagubangon kay adto ko mo-away sa teritoryo sa akong kontra. Ako ani nga maningkamot lang og maayo aron modaog ug makahatag og dungog sa atong nasud," dason pang Mayol.

Ang 24-anyos nga si Mayol nagbitbit og makalisang nga 21-0 win-loss record uban ang 16KOs, samtang si Trejo, ang kasamtangan North America Boxing Federation (NABF) champion, nagtangag og 24-12 win-loss record uban ang 11KOs.

Si Trejo mikulit og walo ka sunod-sunod nga daog sukad siya mapakyas pag-angkon sa WBO minimumweight title human gipukan pinaagi sa unanimous decision ni Ivan Calderon niadtong Septiyembre 5, 2003 didto sa Cesar Bazares Coliseo sa Caguas, Puerto Rico.