Lim, tuluyan nang ipinapatapon

Pinal ng ipapatapon palabas ng bansa si Basketball Association of the Philippines (BAP) secretary general Graham Chua Lim makaraang pekein umano nito ang kanyang Philippine citizenship.

Ayon kay BI Commissioner Alipio Fernandez Jr., maging ang Malacañang-Legal Department ay nagpalabas na ng kautusan noon pang November 9 kung saan ibinabasura nito ang motion na isinumiute ni Lim hinggil sa resolution na ipinalabas ng BI.

Ipinaliwanag ng BI na walang bagong argumento na isinumite si Lim upang pagbigyan ang motion nito.

Una ng kinatigan ng Malacañang ang resulta ng imbestigasyon ng BI kung saan si Lim umano ay gumamit ng mga pekeng dokumento upang makakuha ng kanyang Philippine citizenship.

Ibinasura din ng Malacañang ang katuwiran ni Lim na nakuha niya ang kanyang citizenship batay sa Treaty of Paris at iba pang batas noong panahon na kolonya pa ng Amerika ang Pilipinas.

Gayundin, hindi nakapagsumite ng ebidensiya si Lim na magpapatunay na ang kanyang mga ninuno ay talagang residente ng Pilipinas noong naipasa ang nabanggit na batas. (Grace dela Cruz)