Tinupad nina Olympians Donald David Geisler, Antoinette Rivero at Tshomlee Go nang kanilang pangunahan ang kampanya ng RP taekwondo team para sa overall title sa pamamagitan ng kanilang tagumpay.
Nakopo ni Geisler ang kanyang ikaapat na SEA Games gold medal sa men’s lightweight division habang naisubi naman ni Rivero ang kanyang ikalawang SEAG gold sa women’s division.
Tinalo ni Geisler si Sautvilay Phimmasone ng Laos, 12-4 sa semifinals bago nito pinabagsak si Patiat Thongsalap ng Thailand, 7-6 sa finals tungo sa kanyang ginto.
Matapos makabye sa quarterfinals, tinalo ni Rivero si Bui Thu Hien ng Vietnam, 13-1 sa semis bago nito iginupo si Voppy Trismawarty ng Indonesia, 5-1 para sa kanyang ikalawang SEA Games gold.
Dinispatsa naman ni Go si Mohn Afifuddin Omar Sidek ng Malaysia sa semifinals, 4-2 bago nito naungusan si Yu Anh Tuan ng Vietnam, 2-1 sa final round para sa kanyang kauna-unahang SEA Games gold.
Ang ikaapat na ginto ay inihatid ni Esther Marie Singson mula sa bantamweight nang kanyang igupo sina Farrahwaheeda Haji Bujang ng Brunei, 3-1 sa semis bago nito dinispatsa si Juang Wansa Putri ng Indonesia, 4-2 sa finals para sa kanyang ginto sa women’s bantamweight.