Ex-Kings bumandera sa Magnolia

Matapos mapagkaitan ng playing time sa professional league, nakuha naman ito ni Kim Valenzuela sa kanyang pagbaba sa amateur league.

Kumonekta si dating Ginebra Gin King point guard Kim Valenzuela ng 17 puntos para tulungan ang Magnolia Dairy Ice Cream sa 79-70 tagumpay kontra sa Granny Goose sa pagdribol ng 2005 PBL Heroes Cup kahapon sa La Salle Greenhills Gym.

Dalawang puntos lamang ang nailista ng 5-foot-9 na Fil-Am sa first period bago tumipa ng dalawang 3-point shot sa second quarter kung saan kinuha ng Wizards, may 1-0 kartada ngayon, ang 39-32 abante laban sa Snack Masters sa pagsasara nito.

Isang maikling 7-4 rally ang inilunsad ng Granny Goose sa third period mula kina Abby Santos, JR Quiñahan at Alfie Grijaldo na nagdikit sa kanila sa Magnolia sa 39-43 sa gitna ng nasabing yugto.

Mula sa pagbibida nina Valenzuela, Arwind Santos, Jeffrey Chan at Fil-Am Kelly Williams, isang 7-0 atake ang ginawa ng Wizards ni coach Koy Banal na muling naglayo sa kanila sa 50-39 sa 6:18 nito bago iposte ang 62-50 lamang sa Granny Goose sa pagsasara nito.

Humugot ng dalawang freethrows si Valenzuela, pinanood nina Gin Kings Jay-Jay Helterbrand, Sunday Salvacion at Fil-Am rookie Mike Holper, na naglatag sa 71-60 abante ng Magnolia sa huling 3:54 ng final canto hanggang makabangon ang Granny Goose ni mentor Jun Tan sa 69-74 agwat sa nalalabing 26.6 segundo buhat sa basket ni Quiñahan.

Tatlong freethrows nina Chan at Alex Angeles ang tuluyan nang tumiyak sa tagumpay ng Wizards sa pagtatala nila ng 76-69 abante sa nalalabing 16.5 tikada. (Russell Cadayona)