Realtors dapa sa Barakos

Sadya yatang may dalang kamalasan si import Leon White.

Matapos palitan si Luke Whitehead, tatlong sunod na kamalasan na ang natikman ng Sta. Lucia na nagbaba sa kanilang baraha sa 2-4.

Ipinatikim ng Red Bull Barako ang naturang pangatlong dikit na pagkatalo ng Realtors mula sa kanilang dominanteng 95-78 pagwawagi upang sikwatin ang ikatlong puwesto sa eliminasyon ng 2005 San Mig Coffee-PBA Fiesta Conference sa Cuneta Astrodome kagabi.

Nailista ng Red Bull ang kanilang 4-2 rekord mula na rin sa career-high 12 produksyon ni rookie Leo Najorda para dumikit sa mga nangungunang Purefoods Chunkee, may 5-1 kartada, at Talk N Text, nagdadala ng 4-1 marka.

Ipinoste ng Barakos ang malaking 47-34 bentahe sa pagpinid ng second quarter, tampok rito ang 19 puntos ni import Quemont Greer, hanggang makaahon ang Realtors sa 65-71 agwat sa unang apat na minuto ng fourth period.

Isang 9-0 bomba naman ang inihulog ng grupo ni mentor Yeng Guiao sa sumunod na tagpo upang itala ang 80-65 abante sa huling 6:32 ng sagupaan patungo sa 85-72 lamang, 3:23 rito.

Samantala, magsasagupa naman ang San Miguel at Air21 ngayong alas-4:30 ng hapon sa out-of-town game ng liga sa Roxas City, Capiz kung saan hangad ng Beermen na matikman ang kanilang kauna-unahang panalo matapos ang 0-4 start.