Salu-salo para sa mga SEAG Athletes

Isang maghapong salu-salo sa Puerto Azul sa Cavite City ang itinakda ngayong araw ng Philippine Sports Commission (PSC) para sa mga national athletes mula sa Rizal Memorial Sports Complex sa Manila at sa PhilSports Complex sa Pasig City.

Ang naturang okasyon, ayon kay PSC chairman William ‘Butch’ Ramirez, ay bilang pagbibigay ng pahinga sa mga atletang puspusan ang ginagawang paghahanda para sa darating na 23rd Southeast Asian Games sa Nobyembre.

Sa kanilang pagdating sa Cavite, ang mga atleta ay sa-salubungin ng mga nagwawagayway na mga Caviteño patungo sa munisipalidad ng Trece Martires kung saan naman naghihintay si Gov. Ireneo ‘Ayong’ Maliksi.

"Aside from Governor Maliksi, magbibigay rin ng mga inspirational speech ‘yung iba mga Mayors para sa ating mga atleta," ani Ramirez.

Nais ng komisyon na pagpahingahin sa matindi nilang pagsasanay ang mga atleta.

"Gusto naman natin silang bigyan ng kahit papaano ay konting break at konting pagbabago sa athmosphere mula sa kanilang training," ani Ramirez. "Para itong get together ng mga athletes, officials." (Russell Cadayona)